Брэсцкага абласнога выканаўчага камітэта
Выстава дакументаў «Брэст. ХХ стагоддзе: старонкі гісторыі», прысвечаная 1000-годдзю горада
У Дзяржаўным архіве Брэсцкай вобласці арганізавана выстава дакументаў «Брэст. ХХ стагоддзе: старонкі гісторыі», прысвечаная 1000-годдзю горада, якое адзначаецца сёлета.
На выставе экспануюцца каля 90 дакументаў, артыкулаў з газет, фатаграфій.
Экспазіцыя ўмоўна падзелена на некалькі блокаў, кожны з якіх прысвечаны пэўнаму перыяду ў гісторыі Брэста ХХ стагоддзя, а прадстаўленыя матэрыялы адлюстроўваюць адметныя рысы і значныя падзеі з жыцця горада на тым або іншым этапе:
дакументы за 1919-1939 гг. (перыяд уваходжання горада ў склад польскай дзяржавы) расказваюць аб дзейнасці органаў самакіравання, перайменаванні вуліц, аднаўленні горада пасля Першай сусветнай вайны, статыстыцы насельніцтва і інш.;
матэрыялы перадваеннага савецкага перыяду (верасень 1939 г. – чэрвень 1941 гг.) адлюстроўваюць падзеі па ўстанаўленні савецкай улады і першых яе мерапрыемствах у горадзе, перайменаванню вуліц, развіццё прамысловасці горада ў гэты перыяд і інш.;
дакументы перыяду нямецка-фашысцкай акупацыі (1941-1944 гг.) утрымліваюць звесткі аб мерапрыемствах, якiя праводзiлiся акупацыйнымі ўладамі, перайменаванні вуліц, сістэме харчовага забеспячэння, прымусовай працы і ўгоне мясцовых жыхароў у Германію, аб знішчэнні яўрэйскага насельніцтва горада і інш.;
матэрыялы за 1944-1980-е гг. дэманструюць імклівае развіццё горада ў пасляваенны перыяд, расказваюць аб стварэнні і адкрыцці прамысловых прадпрыемстваў, устаноў адукацыі, аховы здароўя, культуры, тэлецэнтра, мытнага паста «Варшаўскі мост» і другіх знакавых аб'ектаў, аб утварэннi Ленінскага і Маскоўскага раёнаў горада ў 1978 годзе, аб статыстыцы насельніцтва ў розныя гады і інш.
дакументы за 1990-е гг. гавораць аб зацвярджэнні герба горада, аб стварэнні гарадской газеты, аб заснаваннi міжнароднага тэатральнага фестывалю «Белая вежа», аб адкрыцці Лядовага палаца і інш.
Безумоўна, у рамках адной выставачнай экспазіцыі падрабязна адлюстраваць усю гісторыю горада Брэста ў ХХ стагоддзі немагчыма, тым не менш прадстаўленыя матэрыялы коратка, але ярка дэманструюць яе значныя моманты ў гэты перыяд.
Выстава экспануецца ў фае будынка архіва па вул. В.Харужай, 15.