Як і ўсе пары маладых, жаніх і нявеста пад гукі марша Мендэльсона ўвайшлі ў залу рэгістрацыі шлюбаў. Хлеб-соль, ручнік, які па традыцыі перад маладымі разаслалі на доўгае жыццё, абмен заручальнымі пярсцёнкамі, першы сямейны вальс… Усе гэтыя важныя атрыбуты вяселля ўспрымаліся ўрачыста і хвалююча. Але было і тое, што надало ўрачыстай рэгістрацыі сваю адметнасць. У рамках святочных мерапрыемстваў, якія праводзяцца аддзелам загса райвыканкама з нагоды 100-гадовага юбілею, маладую сям’ю павіншавала начальнік аддзела загса райвыканкама Наталля Камянчук і разам з пасведчаннем аб заключэнні шлюбу ўручыла Кодэкс Рэспублікі Беларусь аб шлюбе і сям’і, памятны адрас і сувеніры. Атрымала віншаванне і падарунак юбілейная пара і ад кіраўніцтва раёна. Маладым жадаў шчасця, мудрасці ў пераадоленні ўсіх жыццёвых цяжкасцей намеснік старшыні райвыканкама Вадзім Шпетны. А свой першы сямейны вальс Арцём і Анастасія танцавалі пад музычны падарунак ад салісткі гарадскога Дома культуры Вікторыі Ляўчук.

Арцём Шчарбіна і Анастасія Валошчык у дзень падачы заявы і падумаць не маглі, што іх шлюб будзе сотым па ліку, зарэгістраваным аддзелам загса Маларыцкага райвыканкама.

- Гэта стала для нас самым сапраўдным прыемным сюрпрызам,  нечаканым і сімвалічным, дзяліліся ўражаннямі маладыя.

Кампазіцыя з паветраных шароў з лічбай 100 і лебедзямі – сімвалам чысціні і трываласці шлюбу – у руках Арцёма і Анастасіі надавала іх маленькаму святу асаблівы статус, напамінаючы, што кожная сям’я – гэта неад’емная частка грамадства.  Жаніху і нявесце госці жадалі пражыць не менш, як сто гадоў, мець сто надзейных сяброў і захаваць на ўсё жыццё лебядзіную вернасць.